1. Noiz eta nola sortu zen Gizalde?

Gizalde 1998ko uztailean sortu zen. 80etan izan zen asoziazionismoaren boomaren ondorioz elkarte andana sortu zen, eta informazio guzti hura bildu eta antolatzeko gune bat sortzearen beharra antzeman zen. Gainera, beste erkidego batzuetako esperientziak ezagutzen ziren, hala nola Bartzelona edo Bizkaikoak. Hori ere Gizalde sortzeko bultzada bat izan zen.

2. Zein da bere xedea?

Gizalderen helburua borondatezko ekintza sustatu eta bultzatzea da, eta, era berean, herritarren artean partaidetza soziala. Horretarako, norbanakoei informazioa eta aholkua ematen die, elkarteentzako aholkularitza eta baliabideak eta, oro har, herritar guztiei zuzendutako sentsibilizazio- eta boluntariotzaren ikusgarritasuna areagotze- jarduerak.

Gainera, kontuan izanda boluntariotza erakunde baten barruan izaten dela, erakunde horiek babestea ere garrantzitsua iruditzen zaigu. Horregatik, behar desberdinak antzematen joan gara bai eta haiei lagundu ahal izateko espazioak ere, eta horrela egiten dugu boluntariotzaren kudeaketarekin zerikusia duen guztiarekin.

Aldi berean, materiala mailegu-zerbitzua dugu. Horretarako, material izan ez eta erabili nahi duten entitateei materialak maileguan uztea helburu duen material-zerrenda bat dugu (karpak, mahaiak, aulkiak, proiektagailuak, audio-ekipoak...).

Aipatutakoaz gain, elkarteen sareetan ere parte hartzen dugu, entitate desberdinen arteko harremanak erraztuz.

3. Zertan datza boluntariotza?

Legeak dio boluntario izatea zure denbora librea besteen mesedetan ematea dela, antolakuntza baten barruan, jarraikortasunez, ordainsaririk jaso gabe eta lanpostuak ordezkatzen ez direnean. Legeak ez ditu boluntariotza kontsideratzen aldian aldiko ekintzak, puntualak direnak edo entitateetatik at burututakoak, ezta auzotasun ona dela eta edo familiaren barruan egindakoak ere, eta abar.

Niretzako boluntariotza egiteak proiektu bat dagoela esan nahi du, denboran jarraikortasuna izateko bokazioz sortua, eta proiektu horrekin modu askean konpromezua hartzen duten pertsonak.  

4. Nor izan daiteke boluntario? Zein dira horretarako bete beharreko baldintzak?

Hasiera batean, edonor izan daiteke boluntario, boluntariotza-legeak ez du horretarako adin-mugarik ezartzen. Gertatzen dena da elkarteak berak direla adin-mugak ezartzen dituztenak. Betaz, printzipioz, bere denbora besteen alde emateko prest dagoena, gogoa duena eta denboran modu jarraian jarduteko bokazioa, boluntario izan daiteke. Hortik aurrera, adinak jarri ditzake mugak segun eta non izan nahi den boluntario.

5. Nola bideratu boluntario izan nahi duten pertsonak?

Pertsona bat hurbiltzen zaigunean, entzun egiten dugu zeren bila datorren, zein den bere motibazioa. Hortik aurrera, bereizten hasten gara zerk piztu dezakeen bere interesa eta zerk ez, zer egin daitekeen aztertzen dugu, zein eremutan, zein kolektiborekin... Asko dira aukeratzeko garaian erabili daitezkeen irizpideak, baina irizpide geografikoak edo boluntariotzara eman nahi den denborak ere baldintzatu dezakete. Azken finean, arrazoi ezberdinak direla eta, aukerak baztertzen joan behar da, eta hau bi aldeen artean egiten den prozesua da.

6. Gaur egun, boluntario gehiago behar ditugu?

Nik uste dut beti beharko direla boluntarioak; deitu boluntariotza, deitu auzotasun ona. Iruditzen zait pandemiak auzotasun ona berreskuratzen lagundu digula, edo haren garrantziaz jabetzen bederen. Horrenbestez, ez dakit legalki eratutako entitateen bitartez edo auzotasun onaren bidez, baina ingurura begiratzea eta bizilagunak zerbait behar ote duen, beti kontuan izan beharko genukeen zerbait da. 

Esango nuke, oinarrian ez dagoela boluntariotza bat egitea, boluntario izan egiten da. 

Boluntario izatea eskaintzen ditudan ordu horiez haratago doa, adi dagoen begirada da. Eta badago jendea begirada hori duelako egin dena boluntario, eta jendea, ekintza boluntario horren ondorioz (beste errealitate batzuk ezagutzeak), begirada aldatu duena.

7. Gaur, boluntariotzaren nazioarteko eguna izanik, nolabait ospatzen duzue?

Sareginez saretik, sentsibilizatzeko eta ikusarazteko zerbait antolatzen dugu. Horrela, gure weborrian ikus daitekeenez, kalean gauzatuko den ekitaldi baten bitartez egingo dugu. Abenduaren 3an Gipuzkoa Plazara aterako gara, eta nahi duen oro hurbildu ahal izango da, lorontzi batean erraboil bat landatzera, etxera eraman ahal izango duena. Boluntariotzaren esanahia era sinboliko batean helarazi eta ikusarazteko modua da. Boluntario izatea ereitea bezala da, ondoren bere fruituak ematen ditu, gizartearen hobetzea.

8. Hitzik eskaini nahi al diezu elkarrizketa hau irakurtzen ariko diren pertsonei? Nola animatuko zenituzke boluntario egitera edo horretan jarraitzera?

Denak animatzen ditut, erabil gaitzaten informazioa eta orientazioa bilatzeko; Gizalde horretarako dago. Arlo asko daudenez, uste dut pertsona guztiek topa dezaketela gustura sentiaraziko dien hori. Niretzako, boluntariotzak perspektiba aldaketa eragin dezake norberarengan, eta hori oso da garrantzitsua. Gainera, eskubideak dituen herritarra naizen bezala, eskaintzeko ardura ere badudala uste dut. Horregatik, denok animatzen zaituztet. 

Mila esker, Miren, eskaini didazun denbora honengatik, zure emate eta pasioagatik. Zuen lana niretzako aurkikuntza handia izan da, eta, esango nuke, nire boluntario-hastapenetan bidea erraztuko zidaten bezala, Gizaldek laguntza itzela eskain diezaiokeela boluntario izateko gogoa duen edonori bere bilaketan.

Mila esker, bihotzez, gizarte bidezkoago eta solidarioago baten aldeko zure emateagatik.

Elkarrizketa hau irakurri duen oro animatzen dut beraien web-orria bisitatzera, dena oso ondo antolatuta eta azalduta dutela iruditzen baitzait. Halaber, aukera baduzue, Donostiako Gipuzkoa Plazan, abenduaren 3an egingo duten ekitaldian parte hartzera ere animatzen zaituztet.

Bukatzeko, gaur boluntariotzaren nazioarteko egun honetan, OnDoaN Topaguneak eskaintzen dituen jarduera eta proposamenak aurrera atera daitezen beren maitasun eta kontu guztia jartzen dutenei esker-hitz hauek eskaini nahi dizkiet. Eta, dakiten ongien beren hondar-alea egunero jartzen duten pertsonei. Mila esker.

Elkarrizketaren egilea:

Maddi Arana Arzak